جمہوریہ الجزائر نے عالمی برادری سے مطالبہ کیا ہے کہ وہ فلسطینیوں کے خلاف اسرائیلی مظالم جلد از جلد بند کروائیں۔

غور طلب رہے کہ کل سوموار کو ایک پریس بیان میں، جمہوریہ الجزائر نے ان اشتعال انگیز خلاف ورزیوں کی مذمت کی ہے، جو فلسطینی عوام اور ان کے جائز، ناقابل منتقلی حقوق پر منظم اسرائیلی حملوں کا حصہ ہیں۔

بیان میں الجزائر نے عالمی برادری سے مطالبہ کیا کہ وہ فلسطینی عوام کے خلاف اسرائیلی ہٹ دھرمی اور ان کے خلاف جاری وحشیانہ مظالم کا سلسلہ جلد از جلد بند کرائیں اور فلسطینی قوم کے حقوق کے حوالے سے اپنی آئینی اور اخلاقی ذمہ داریاں پوری کریں۔

الجزائر نے فلسطینی قوم کے ساتھ مکمل یکجہتی کااظہار کرتے ہوئے فلسطینیوں کے تمام جائز حقوق کی حمایت کی ہے۔ بیان میں کہا گیا ہے کہ الجزائر کا فلسطینی قوم کے حقوق بالخصوص حق خود اردایت، آزاد فلسطینی ریاست کے قیام اور القدس کو اس کا دارالحکومت بنانے کی حمایت جاری رکھے گا۔