اقوام متحدہ کے اعلیٰ عہدیدار ٹور وینز لینڈ نے جمعہ کے روز سلامتی کونسل میں بتایا کہ اسرائیل کے زیر قبضہ فلسطینی علاقے – ویسٹ بینک میں روزانہ کی بنیاد پر ہونے والا تشدد بے قابو ہو رہا ہے۔ اسرائیل اور فلسطین دونوں کے رہنماؤں کو امن کی بحالی کے لئے فوری اقدامات کرنے ہوں گے۔ اس کے لئے عالمی برادری کا بھرپور تعاون بھی ضروری ہے۔ ٹور وینز لینڈ مشرق وسطیٰ میں امن عمل کے لئے اقوام متحدہ کے خصوصی رابطہ کار ہیں۔

انہوں نے کہا کہ ''بنیادی اہمیت کے سیاسی مسائل'' کو حل ہونا چاہیے ورنہ گہری بداعتمادی اور دشمنی بڑھتی رہے گی۔

ان کا کہنا تھا کہ ''مجھے تشویش ہے کہ بچے بھی تشدد کا نشانہ بن رہے ہیں۔ بچوں کو تشدد اور نقصان کا ہدف نہیں بنانا چاہیے۔''

انہوں نے سلامتی کونسل کے رکن ممالک کے سفیروں سے کہا کہ حالیہ ہفتوں میں بہت سے لوگ ہلاک ہو چکے ہیں جن میں بڑی تعداد فلسطینیوں کی ہے۔ ان حالات میں ''بڑھتی ہوئی ناامیدی، غصے اور تناؤ'' کا ماحول بننے لگا ہے جس سے تشدد کا مہلک سلسلہ مزید زور پکڑ رہا ہے اور اس پر قابو پانا روز بروز مشکل ہوتا جا رہا ہے۔