لیگ آف پارلیمنٹرینز فار القدس (LP4Q) کی ایگزیکٹو باڈی کا متواتر اجلاس استنبول میں اتوار 20 نومبر 2022 کو لیگ کے صدر شيخ حميد بن عبد الله الاحمر کی سربراہی میں منعقد ہوا۔ 

لیگ کے سربراہ شيخ حميد بن عبد الله الاحمر نے بتایا کہ اس اجلاس میں بین الاقوامی پارلیمانی اداروں میں اپنی موجودگی کو مضبوط بنانے کے علاوہ آنے والے عرصے کے دوران لیگ کے کاموں کی حکمت عملی، سالانہ کانفرنس کے انعقاد کے انتظامات اور انٹر پارلیمنٹری یونین میں مبصر کی رکنیت حاصل کرنے کے لئے لیگ کے فائل کی فالو اپ کرنے پر تبادلہ خیال کیا گیا۔

ایگزیکٹو کمیٹی نے چند روز قبل شمالی غزہ کی پٹی کے جبالیہ مہاجر کیمپ میں ایک رہائشی عمارت میں لگنے والی المناک آگ کے متاثرین کے لئے فلسطینی عوام کے تئیں تعزیت کی تجدید کرتے ہوئے غزہ کی پٹی پر مسلط غیر انسانی ناکہ بندی کو ختم کرنے کی ضرورت پر زور دیا۔ 

اس کمیٹی نے استنبول کی استقلال اسٹریٹ پر شہریوں کو نشانہ بنانے والے دہشت گرد و مجرمانہ بم دھماکے کی مذمت کی اور جمہوریہ ترکی کے ساتھ ساتھ اس دھماکے میں ہلاک اور زخمی ہوئے متاثرین کے لئے اپنی مخلصانہ تعزیت اور ہمدردی کا اظہار کیا۔  

اس اجلاس میں لیگ کے نائب صدر اور انڈونیشیا کی پارلیمنٹ میں بین الاقوامی پارلیمانی تعاون کمیٹی کے چیئرمین ایم پی ڈاکٹر فادلی زون، کویتی قومی اسمبلی کے رکن اسامہ الشاہین، پاکستانی سینیٹ میں دفاع اور خارجہ تعلقات کی کمیٹی کے چیئرمین سینیٹر مشاہد حسین، نائیجیرین پارلیمنٹ کے رکن ابوبکر یونس، ایگزیکٹو باڈی کے رکن عادل رشید، اردن سے ایشیا میں صدر کے معاون محمد عقل، الجزائر سے افریقہ میں صدر کے معاون بشیر جاراللہ، مراکش کی پارلیمنٹ کے سابق رکن عبد اللہ الحلوطی، تیونس کی پارلیمنٹ کی رکن ایم پی لطیفہ الحباشی، فلسطینی قانون ساز کونسل کے رکن سید ابو مسامح، اطالوی پارلیمنٹ کے سابق رکن ميكيل پيراس، ایگزیکٹو کمیٹی کے مشیر بشر شلبی اور محمد صوالح، لیگ کے ڈائریکٹر جنرل ڈاکٹر محمد مکرم بلاوی اور لیگ میں تعلقات عامہ کے سربراہ عبداللہ البلتاجی نے شرکت کی۔