لیگ آف پارلیمنٹرینز فار القدس (LP4Q) کے وفد نے منگل کو ملائیشیا کے دارالحکومت کوالالمپور کے دورے کے موقع پر ملائیشیا کی پارلیمنٹ میں اسلامک پارٹی (PAS) کے بلاک سے ملاقات کی۔

لیگ کے وفد نے اسلامک پارٹی اور دیگر جماعتوں پر زور دیا کہ وہ جنوب مشرقی ایشیا میں علاقائی پارلیمانی لیگ کو فعال کریں۔ فلسطینی کاز اور مسجد اقصیٰ میں موجودگی بڑھانے کے لئے اپنی سرگرمیوں میں اضافہ کریں۔ ساتھ ہی لیگ کے اس وفد نے فلسطینی کاز کی حمایت پر ریاست، سیاسی جماعتوں اور ملائیشیا کے عوام کی کوششوں کا شکریہ ادا کیا۔

وفد نے فلسطینی کاز کے حق میں ملائیشیا کے معاشرے کی موجودہ تحریک کی تعریف کی، جو اب صرف امداد یا انسانی امداد تک محدود نہیں ہے بلکہ فلسطینی عوام کے مطالبات کی حمایت کے لئے متحرک ہونے کی حالت میں منتقل ہو گئی ہے۔

غور طلب رہے کہ لیگ کا ایک وفد پیر کے روز ملائیشیا کے دارالحکومت کوالالمپور پہنچا ہے۔ یہ لیگ کی طرف سے عرب، اسلامی و بین الاقوامی پارلیمانوں میں فلسطینی کاز کی موجودگی کو بڑھانے کیلئے کئے گئے غیر ملکی دوروں کے سلسلے کا ایک حصہ ہے۔ 

اس وفد میں لیگ کے صدر شیخ حمید بن عبداللہ الاحمر کے علاوہ  لیگ کے نائب صدر و انڈونیشیا کی پارلیمنٹ میں بین الاقوامی پارلیمانی تعاون کمیٹی کے چیئرمین ایم پی ڈاکٹر فادلی زون، لیگ کی ایگزیکٹو باڈی کے رکن اور پاکستانی سینیٹ میں دفاع و خارجہ تعلقات کی کمیٹی کے چیئرمین سینیٹر مشاہد حسین، ملائیشین پارلیمنٹ کے رکن پارلیمنٹ سید ابراہیم، لیگ کے مشیر پروفیسر ڈاکٹر محمد آفندی صالح، لیگ کے ڈائریکٹر جنرل ڈاکٹر محمد مکرم بلعاوی اور لیگ میں تعلقات عامہ کے سربراہ عبداللہ البلتاجی شامل ہیں۔