لیگ آف پارلیمنٹرینز فار القدس (LP4Q) کے ایک وفد نے زمبابوے کے وکٹوریہ فالس میں افریقی پارلیمانی یونین کے44ویں سیشن کے کام اور جلسے میں شرکت کی۔

لیگ کے وفد کی سربراہی ڈائریکٹر جنرل ڈاکٹر محمد مکرم بلاوی کر رہے تھے۔ انہیں سرکاری طور پر یونین کی طرف سے اس اجلاس میں شرکت کے لئے مدعو کیا گیا تھا۔ اس سیشن میں دہشت گردی اور پرتشدد انتہا پسندی سے نمٹنے کے لیے پارلیمنٹ کے تعاون اور آبادی پر پڑنے والے دہشت گردی کے معاشی و سماجی اثرات پر تبادلہ خیال کیا گیا۔ اس موقع سے اقوام متحدہ کے دفتر برائے انسداد دہشت گردی کے نمائندے نے انسداد دہشت گردی کے شعبے میں پارلیمانی کارروائی کو مربوط بنانے کے طریقہ کار پر ایک پریزنٹیشن بھی دیا تاکہ اس کام کو مزید موثر بنایا جا سکے۔

اس دوران لیگ کے وفد نے اس اجلاس میں شرکت کرنے والے افریقی وفود سے ملاقات کی اور بین الاقوامی فورمز میں فلسطینی کاز کی حمایت اور انٹر پارلیمنٹری یونین میں مبصر کی رکنیت حاصل کرنے کے لئے لیگ کی فائل کی حمایت کرنے کے علاوہ افریقی پارلیمانوں کے ساتھ رابطے بڑھانے کے طریقوں پر تبادلہ خیال کیا۔

غور طلب رہے کہ افریقی پارلیمانی یونین نے گزشتہ سال اکتوبر میں جبوتی میں منعقدہ یونین کی ایگزیکٹو کمیٹی کے 76ویں اجلاس کے دوران لیگ آف پارلیمنٹرینز فار القدس کو یونین میں مبصر کی رکنیت کا اعلان کیا تھا۔ 

لیگ کے پاس افریقی پارلیمانی یونین کے علاوہ اسلامی تعاون تنظیم (او آئی سی) کے رکن ممالک کی پارلیمانی یونین (PUIC)، عالمی تنظیم برائے پارلیمنٹرینز اگینسٹ کرپشن (GOPAC) اور عرب انٹر پارلیمنٹری یونین میں مبصر کی رکنیت حاصل ہے۔